silver lining

​म फर्किने दिन औँला, भाँची कुरे है त सानी। आउँदै छु भेट्न माला, गाँसी कुरे है त सानी। जाने बेला कुइनेटोमा, टिल्पिल् थे परेला नि, ओभानु गरी ती आँखा, हाँसी कुरे है त सानी। किताबमा राखेकी थ्यौ, सुकिगो कि गुलाब त्यो, ओइलाउन्न मेरो माया, साँची कुरे है त सानी। भीडमा एक्लै निस्सासिँदा, तिम्रै याद सहारा थ्यो, सम्झना मन भरि सारा, टाँसी कुरे है त सानी।

म त भन्छु देश चलाउन, ठेक्कामा नै दिउँ हेर, आह्वान गरी बोलपत्र, आवेदन नै लिउँ हेर। मुकुट थियो,घाम आयो, रूख अनि जङ्गल छायो, आफ्नै हात जगन्नाथ, जनताको चै निउँ हेर। हट्ने होइन डटी लड्ने, ङिच्च गरी झोली थाप्ने, वीर हामी पानी धरि, मागेर नै पिउँ हेर। देशप्रेम नशामै बग्छ, मुटुमा हाम्रो चन्द्र सूर्य, डिभी-पीआर फारम भरी, देशभक्त भै जिउँ हेर।